Читать бесплатно онлайн книгу  Лезе ў вочы ззянне месяца

автор Бядуля Змітрок

Змітрок Бядуля

Лезе ў вочы ззянне месяца

Месяц яркі, як пажар.

Мне здаецца, стаіць лесвіца

3 азярода аж да хмар.

А па лесвіцы па срэбранай 

Нехта лазіць угару.

I кашуля на ім зрэбная,

I глядзіць ён на зару...

А зара яшчэ ледзь сцелецца, 

Грае міскаю нябёс,

Сыпле іскры на аселіцу,

На вяршаліны бяроз.

А туман дыміць над грэбляю.

Млын, бы човен уначы.

Вецер носіць вільгаць глебную.

Птушка крыкне, замаўчыць.