Читать бесплатно онлайн книгу  Месячыку-месяц…

автор Жылка Уладзімір

Уладзімір Жылка

Месячыку-месяц...

* * *

 

Месячыку-месяц,

Срэбненькія рожкі

З-за хмарынкі, месяц,

Выгляні хоць трошкі.

 

Бедная галоўка,

Што не мае долі:

Дажынаць свякроўка

Кінула на полі.

 

Супраць ночы цёмнай

Ледзь дамоў вяртаю,

Цішынёй таёмнай

Цемната пужае.

 

Мгліца ў вочы лезець,

Не відаць дарожкі,

Месячыку-месяц,

Срэбненькія рожкі.