Читать бесплатно онлайн книгу Праснічка
Ян Чачот
Праснічка
Гожыя дзяўчаткі
Ля праснічак селі -
Тоненькія ніткі
Цягнуцца з кудзелі.
Віся, вераценца,
Віся, ды баржджэй!
Доўга тая любіць,
Дзе нітка даўжэй.
Паплыў нарачоны
Ў Кралявец віцінай,
Развітаўся шчыра
З любаю дзяўчынай.
Віся, вераценца,
Віся, ды баржджэй.
Доўга тая любіць,
Дзе нітка даўжэй.
Хораша прадзецца
Маладой дзяўчыне.
Тры дні сумавала
Аб сваім хлапчыне.
Віся, вераценца,
Віся, ды баржджэй.
Доўга тая любіць,
Дзе нітка даўжэй.
Сеў тут іншы хлопец
Да яе, ахвочы.
Свецяцца ў дзяўчыны
Зноў ад шчасця вочы.
Віся, вераценца!
Рвецца нітка - ой!
Залілася дзеўка
Чырванню густой.
