Читать бесплатно онлайн книгу автора Лісіца і жораў
Беларускія народныя казкі
Ліса-каталічка
Ішла сабе ліса, знайшла падсмажанае мяса ў пастцы. Дагадалася яна, што гэта яе хочуць злавіць. I не дакранулася да мяса. Пайшла яна далей, сустракае мядзведзя:
— Кумок-галубок, ці снедаў ты сёння?
— Не, кумка-галубка, не прыйшлося.
— Ну, пойдзем, я цябе завяду ў адно месца — слаўнае снедан-не будзе! Сама б з’ела, ды сёння серада — мне нельга есці: я каталічка.
— Спасіба, кумка-галубка, пойдзем!
Вось ліса падвяла мядзведзя к гэтаму мясу. Як толькі ён дакрануўся, так яго абхваціла пастка і падняла ўгару. Лісіца ўзяла тады мяса ды й есць. А мядзведзь ёй:
— Кумка-галубка, табе ж серада.
— Э, кумок-галубок, няхай той серадзіць, хто ўгару глядзіць.
