Асылында ең үлкен сынақтар пайғамбарларға, одан кейін әулие құлдарға және дәрежесіне қарай өзге мүміндерге беріледі. Алла тағала өзі сүйген құлдарын неше түрлі сынақпен сынайды және үлкен бір істер жолына салып, болашақтағы ұлы мақсаттарға мұрындық болуға дайындайды. Үлкен сынақтар адам баласына ауыр көрінгенмен, сабыр еткен адамның осы арқылы қателері кешіріліп, күнәлары тазарады. Басқаша айтқанда, осы дүниеде адамның тап болған қиындықтары адам үшін ауыртпалық емес, өзіне адал құл болғаны үшін Жаратушы иенің жақсылығы мен берекесі екенін білдіреді.