Фолиант

«Үш ноян» — француздың классик жазушысы Александр Дюманың ең танымал романы. Қаламгер бұл тарихи романына XIII Людовик патшалық құрған дәуір оқиғаларын арқау еткен. Шығармада Парижге гвардия нояны атану үшін үй-жайын тастап шыққан гаскондық д’Артаньян есімді жас дворяндық пен оның үш досы Атос, Портос және Арамистің басынан кешкен қызықты оқиғалары баяндалады.
Нағыз ерлер достығы мен адалдық, ізгілікпен қатар сатқындық секілді өмірдің қатал заңдылығын қоса бейнелейтін осынау туындының ғасыр аралап, біздің оқырманымызға жеткен өміршеңдігі өлшеусіз. Роман шытырман оқиғалы жанрда жазылған.

Жазушының бұл кітабына оқырманның ыстық ықыласына бөленген «Қайыршының миллиардер досы», «Періштелер жоқ жерде» шығармалары және әр жылдары жарық көрген сатиралық, лирикалық әңгімелері топтастырылды. Өткір тілді қаламгер
әр туындысында қазіргі қоғамның әлеуметтік және моральдық мәселелерін кейіпкерлерінің сан қилы тағдыры арқылы шебер жеткізеді. Кітап көпшілік оқырманға арналған.

Танымал жазушы Рамазан Тоқтаров өзінің «Абайдың жұмбағы» атты романында ұлы ақынның туғанынан бастап дүниеден өткеніне дейінгі тұтас бір дәуір панорамасын жасауды мақсат еткен. Романда Абай өмірінің сан салалы қоғамдық, әлеуметтік көріністері кең қамтылып, айшықты көркем тілмен бейнеленген. Автор ұлы Абайдың әдеби бейнесін толымдырақ етіп жеткізу үшін қамтылмай келе жатқан жайттарға, ақын өмірінің әлі ашылмаған қырларына бойлап, уақыт тасалаған шындыққа бүгінгі заман көкжиегінен көз жібереді. Романда оның әйгілі тұстастары, қазақтың тұңғыш ғалымы Ш. Уәлиханов пен ғұлама жазушы Ф.М. Достоевскийдің Семей қаласында бас қосқан жылдары, сондай-ақ Абайдың өз ақын шәкірттерін тәрбиелеу бағытында сіңірген ғибратты істері де баяндалады. Қалың оқырман жылы қабылдаған бұл туындыны зерттеушілер жаңа дәуірдегі әдебиетімізге қосылған сүбелі үлес деп таниды. Шынайы суреткердің шеберлігін танытқан шығарманың көркемдік дәрежесі жоғары, тілі бай. Кітап көпшілік қауымға арналған.

Оралхан Бөкей өр Алтайдың тамылжыған тұмса табиғатын, ерліктің үлгісін көрсетіп жүрген адамдарын, олардың қилы тағдырын өзінің үлкенді-кішілі шығармаларына өзек етті. Қандай әңгімесін қолыңызға алмасаңыз да, оның әр парағынан ауыл иісі, ауыл тұрмысы аңқып тұрады. Жазушының әңгімелері өмірді сүюге, табиғат әдемілігін көре білуге үйретеді.
Әр шығармасының түбінде терең түйін, астарлы ой бұғып жататындықтан, оны бірден түсіну қиын. Алайда арманшыл, қиялшыл болғанымен, ойшыл, мұңшыл, жан дүниелері сағыныш пен ынтығуға, күрсініс пен өкінішке, шексіз ынтызарлық пен құпияға толы кейіпкерлері ә дегеннен қызықтырып әкетеді.
Кітапқа жазушының шоқтығы биік шығармалары — «Мұзтау» және «Қар қызы» хикаяттары еніп отыр.

Чарльз Диккенстің бұл романында дүние есігін аша сала жетім қалған, Лондонның қараңғы жерлерінде жүруге, көптеген қиыншылықтар көруге мәжбүр болған баланың тарихы баяндалады. Шығармадағы көңіл толқытарлық көріністер және төбе құйқаны шымырлататын сұмдық оқиғалар әрдайым юмормен астасып отырады. Кішкентай кейіпкердің тағдыры, оның жолындағы көптеген кездесулер мен қауіпті оқиғалардың бақытты аяқталуы оқырмандардың шынайы қызығушылығын тудырары сөзсіз.

Қазақ әдебиетінің классигі Мұхтар Әуезовтің шығармалар жинағына жазушының 1921–1947 жылдар аралығында жазған әңгімелері, 1916 жылы болған Қарқара немесе албан көтерілісі жайлы «Қилы заман» және шынайы оқиғаға негізделген атақты «Қараш-Қараш» повестерімен қатар, кеңес заманында тыйым салынып, бұған дейін еш жерде жарияланбаған «Хан Кене» пьесасы енген.

«Көк бөрілердің көз жасы» романы Түркі қағанатынан соң ту далада ту тіккен Найман, Керей, Меркіт мемлекеттерінің дәуірлеу және жойылу тарихы арқылы Шыңғыс ханның Алтайдан Атырауға дейінгі қазақ ұлыстарын қалай біріктіріп, біртұтас мемлекетке айналдырғаны туралы ірі тарихи оқиғаға арналған. Романда керей Оң ханның қиын да қидалы тағдыры, Сәнгүннің шарасыздығы, Жамұқаның аярлығы, найман Таян ханның тәуекелі, Бұйрықтың опасыздығы, Көксау Саурық батырдың ерлігі, Құбатекін жыраудың елдің қамын жеп қайғыруы, Күшліктің қарсылығы мен қаталдығы, меркіт Тоқтабек пен ұлдарының қайсарлығы, Шыңғыс ханның жеке басының парасаты мен пендешілігі, қайырымдылығы мен қатыгездігі, әскери таланты т. б. жан-жақты, образды түрде ашып берілген. Романның тілі жатық, оқиғасы қызықты, сюжет пен мазмұн және композициясы шебер үйлесім тапқан. Бұл жолғы басылымында автор жекелеген атаулар мен мазмұндарына ішінара өңдеу жасады.

«Қамар сұлу» романы өмірде болған оқиғалар негізінде жазылған. Автор шығарма фабуласын Алтай елінде болған кездерінде ел аузынан алған. С. Торайғыров романында қазақ қоғамы ілгері дамуына кесел болып отырған кемшіліктердің ірісі ретінде тамақ үшін бәріне көніп, сұмдыққа көз жұмып отырған надан, көнбіс көпшілікті көрсеткен. Сондай-ақ жазушы әйелдер тағдырын — адамдық правосын ескермеген қоғамдығы түрлі әлеуметтік күштердің осы проблемаға қарым-қатынасын да бейнелеп көрсеткен. Түйінді мәселелерді болашақ өркениет проблемаларымен көтереді. ХХ ғасыр басындағы қазақ қоғамы қайшылықтарын тереңдей талдап, жан-жақты көркем бейнелеген. Көпшілік оқырман қауымға арналады.

«Өкіл әке» — Американың ең күшті қылмыс синдикаттарының бірі — дон Корлеоне мафиясы кланының өмірін баяндайтын классикалық роман. Керемет шынайылықпен жазылған кітап ә дегеннен-ақ оқырманды шым-шытырық оқиға иіріміне алып кетеді. Дегенмен шығарманың ерекшелігі қызықты оқиғасында ғана емес, оның қаһармандары — қарапайым адамдар, олар да ауырады, қайғырады, олар да әлсіз, алайда олар үшін гангстерлік — кәдімгі бизнес. Америка жерінде сицилиялықтар онымен өз таңдауы бойынша айналысып жүрген жоқ, автордың айтуынша, қалыптасқан жағдайға, бәсекелестік талабына, қоғамның қысымына байланысты айналысуға мәжбүр…

Белгілі жазушы-драматург Дулат Исабековтің бұл жинағына таңдамалы хикаяттары еніп отыр. Қазақ әдебиетінде өзіндік қолтаңбасы бар қаламгердің қай туындысы болсын оқырманды ерекше сюжетімен, тартымды бояуымен баурап алады. Жинаққа енген хикаяттарында жазушы түрлі кезеңдегі өмір шындығын шебер баяндайды. Кітап көпшілік оқырман қауымға арналған.